Vatnshlíðarvatn er sunnan vestasta bæjarins í Vatnsskarði í Austur-Húnavatnssýslu.  Vatnshlíðarjörðin tilheyrði forðum Glaumbæ í Skagafirði og var silungsveiði í vatninu talin til hlunninda.  Talsvert er af silungi í vatninu og þar hafa orðið slys, bæði í vatninu og afrennsli  þess, sem rennur til Valadalsár.

Árið 1759 tók bæinn af í gríðarlegu flóði, sem kom niður klettagil í Vatnshlíðarfjalli.  Vinnukona og barn voru grafin upp lifandi daginn eftir.  Systir húsfreyjunnar komst upp á bita og gat krafsað sig út um glugga og sótt hjálp frá næstu bæjum.  Húsfreyjan fannst lifandi, liggjandi fram á barnsruggu.  Hún dó strax á eftir en barnið lifði.  Bóndinn fannst dauður í göngunum og löngu síðar fannst vinnukona með lífsmarki.