Vatnsdalsá í Vatnsfirði á Barðaströnd er örstutt á, en allvatnsmikil.  Hún fellur úr Vatnsdalsvatni á Barðaströnd, skammt austan Brjánslækjar. Sumarveiðin er allt frá örfáum löxum upp í svona 150 á toppsumri.  Gósenárin voru, er hvað mest var af hafbeitarlaxi villuráfandi í hafinu. Þá gekk alltaf talsvert af honum í þessa á en mjög hefur dregið úr þeim göngum síðustu árin. Aðeins ein stöng er leyfð í ánni og veiðist stundum drjúgt af sjóbleikju og stöku sjóbirtingur. Leyfi hafa fengist á Brjánslæk.

Vegalengd frá Reykjavík er 341 km um Hvalfjarðargöng og -159 km stytting, ef siglt er með Baldri frá Stykkishólmi til Brjánslækjar.