|
 SKÁLMARDALSHEIÐI
er fjallvegur upp úr Gjörvidal í Ísafjarðarbotni til
Skálmarfjarðar á Barðaströnd. Hún er frekar lág og
greiðfær, vörðuð og var talsvert nýtt. Gjörvidalsmegin
eru nokkuð brattar brekkur. Butraldabrekka, þar sem
Þorgeir Hávarsson vó Gutralda samkvæmt Fóstbræðrasögu.
Djúpavatn (401m) er um miðja heiðina. Vegalengdin
milli byggða var 18 km, en nú eru bæir beggja vegna komnir í
eyði.
BREIÐADALSHEIÐI
Breiðadalsheiði (610m), einhver hæsti fjallvegur landsins, liggur milli
Önundarfjarðar og Skutulsfjarðar. Snjóflóð á leiðinni ollu oft slysum
og manntjóni. Þegar mest var hættan á snjóflóðum, reyndu vanir
ferðamenn að framkalla þau með ópum og háreisti áður en þeir lögðu af
stað yfir hættulegustu svæðin.
Vestfjarðagöng undir hana og Botnsheiði milli Skutulsfjarðar,
Súgandafjarðar og Önundarfjarðar voru vígð í sept. 1996 en voru opin til
bráðabirgða frá hausti 1995. Göngin eru 9120 m löng, 2000 m tvíbreið en
annars staðar útskot og í 199 m hæð yfir sjó.
EYRARFJALL
Eyrarfjall (360m) er stuttur, sumarfær fjallvegur milli
Ísafjarðar og Mjóafjarðar, sem styttir Fjarðaleiðina
verulega, því ekki þarf að krækja út fyrir nesið milli
fjarðanna. Á þeirri leið er Reykjafjörður, Reykjanes
og Vatnsfjörður og úti fyrir er þriðja eyjan í
Ísafjarðardjúpi, Borgarey.
DYNJANDISHEIÐI
Dynjandisheiði (500m) liggur á milli Dynjandisvogar í Arnarfirði, ofan
Geirþjófsfjarðar, utan í Botnshesti, um Hornatær og Barðastrandar.
Hrikalegastur er vegurinn í Botnshesti ofan Geirþjófsfjarðar.
GEMLUFALLSHEIÐI
Gemlufallsheiði (283m) liggur á milli Önundarfjarðar (Bjarnardal) og
Dýrafjarðar. Þessi heiði kemur talsvert við Gíslasögu Súrssonar. Í
Bjarnardal eru rústir bæjarins Arnkelsbrekku, sem kemur einnig við
Gíslasögu. Þar eru einnig rústir sels og beitarhúsa prestanna í Holti,
þar sem beitarhússmaður var langdvölum aleinn í draugagangi.
GLÁMUHEIÐI
Glámuheiði er vestan Glámu (920m), sem var fyrrum hulin jökli. Hún var
ein fjölfarnasta heiði Vestfjarða upp frá botni Dýrafjarðar til
Skötufjarðar, Mjóafjarðar og Arnarfjarðar. Samkvæmt Sturlungu mund
Þorvaldur Vatnsfirðingur hafa farið um hana á leið sinni til að koma
Hrafni Sveinbjarnarsyni að Eyri (Hrafnseyri) fyrir kattarnef og brenna
hús hans.
HÁLFDÁN
Hálfdán
(Tunguheiði; 500m) liggur milli Bíldudals og Tálknafjarðar og þaðan
liggur leiðin um heiðina, sem er kennd við Mikladal (369m), til
Patreksfjarðar.
HRAFNSEYRARHEIÐI
Hrafnseyrarheiði (552m) liggur milli Dýrafjarðar (Brekkudalur) og
Arnarfjarðar (Hrafnseyrardalur). Næst Dýrafirði liggur leiðin um
Brekkuháls suðastan Sandafells. Heiðin var hættulegur farartálmi og
margar sagnir eru til um ófarir ferðamanna (Manntapagil í sunnanverðri
heiðinni).
HORNATÆR
Hornatær
eru forn fjallvegur milli Vatnsfjarðar og Arnarfjarðar.
KLEIFAHEIÐI
Kleifaheiði (404m) liggur milli Barðastrandar og Patreksfjarðar.
Vegavinnumenn hlóðu vörðu í mannsmynd og kölluðu Kleifabúa.
Listamennirnir höfðu Hákon Kristófersson, alþingismann og bónda í Haga,
í huga, þegar þeir hlóðu vörðuna.
KOLLAFJARÐARHEIÐI
Kollafjarðarheiði (462m) liggur upp úr Laugagólsdal í Ísafirði til
Kollafjarðar við Breiðafjörð. Talsverð umferð var um þennan veg, enda
vel varðaður. Vegalengdin milli Laugabóls og Fjarðarhorns er ríflega 20
km. Oft hafa umræður vaknað um vegabætur á Kollafjarðarheiði, sem
nýttist þá betur en Þorskafjarðarheiði.
STEINGRÍMSFJARÐARHEIÐI
Steingrímsfjarðarheiði (439m) liggur upp úr Steingrímsfirði á
Þorskafjarðarheiði og niður Langadal við botn Ísafjarðardjúps. Vegur,
sem tengdi Hólmavík við nágrannabyggðirnar við Djúp var lagður um
heiðina 1984. Heiðin er flöt og þakin vötnum. Margar sögur fara af
óförum ferðamanna á heiðinni.
TRÖLLATUNGUHEIÐI
Tröllatunguheiði (420m) liggur milli Geiradals í A-Barðastrandarsýslu og
Steingrímsfjarðar í Strandasýslu. Hún er öldótt, grýtt og mýrlend og
prýdd fjölda vatna (Langavatn, Miðheiðarvatn). Víða er viðsýnt af
heiðinni og hæsti staður hennar er Miðheiðarborg (470m). Vestan heiðar
er Arnkötludalur með tveimur eyðibýlum. Milli Gautsdals í Geiradal og
Tröllatungu (Tungusveit) við Steingrímsfjörð eru 23 km.
ÞORSKAFJARÐARHEIÐI
Þorskafjarðarheiði (490m) liggur á milli botns Þorskafjarðar og
Langadals við botn Ísafjarðardjúps. Akvegurinn var lagður yfir heiðina
á árunum 1940-46. Þarna er sumarvegur og mjög víðsýnt af heiðinni.
Vegna þess, hve snjóþung heiðin er, var lagður vegur yfir
Steingrímsfjarðarheiði árið 1984.
STEINADALSHEIÐI
Steinadalsheiði (300m) liggur á milli Gilsfjarðar í Barðastrandarsýslu
og Kollafjarðar í Strandasýslu. Hún er fær stórum bílum og jeppum á
sumrin.
ÓFEIGSFJARÐARHEIÐI
Ófeigsfjarðarheiði liggur sunnan Drangajökuls milli
Ófeigsfjarðar á
Ströndum og Langadalsstrandar við Ísafjarðardjúp í
Norður-Ísafjarðarsýslu. Hún er víðáttumikil og 300-400
m.y.s. Hún er flatlend og kennileiti eru fá.
Þarna eru mörg stöðuvötn og hin stærstu eru Röng og
Vatnalautarvatn nyrðra. Stærst vatnsfalla er Rjúkandi,
sem rennur til Ófeigsfjarðar. Þarna lá vörðuð leið
milli byggða um Hraundal frá Langadalsströnd og meðfram
Rjúkanda niður í Ófeigsfjörð. Heiðin er grýtt og
gróðurlítil og þar eru Einangursfjall (620m) og
Laugalandsfjall vestar.
TRÉKYLLISHEIÐI
er varðaður fjallvegur frá Bólstað í Selárdal norður í Kjós
í Reykjarfirði. Jeppum var ekið yfir heiðina niður að
Djúpuvík. Hún er 300-400 m.y.s. nokkuð slétt, en
brött, grýtt og gróðursnauð niður í Kjós. Afleið lá
með hlíðum Háafells í kaupstað í Kúvíkum. Fyrrum lá
leiðin úr Selárdal um Heiðargötugil. Hin forna leið lá
nokkuð norðar en nú, fyrir norðan Reykjafjarðardal, niður í
Árnesdal í Trékyllisvík og þá var hún réttnefnd.
Austan í heiðinni er Hvannadalur. Þar átti skessa, sem
gerði ferðamönnum skráveifur, heima. Skessu var kennt
um hvarf 12 ferðamanna samtímis. Aðeins druslur af
fötum þeirra fundust. Árið 1673 kól tvo menn á
heiðinni eftir tveggja daga útilegu í vondu veðri.
Annar missti báða fætur. Eftir aðgerðina fór hann að
„maðka” og dó. |
