Hof er margbýli í Öræfum. Þar var kirkja helguð heilögum Klemensi í katólskum sið og útkirkja frá Sandfelli allt til 1970, þegar Hof var lagt til Kálfafellsstaðar í Suðursveit. Torfkirkjan, sem varðveitt er að Hofi, er að stofni frá 1884. Veggir hennar eru hlaðnir úr grjóti og á henni er helluþak, þakið torfi. Þjóðminjasafnið fékk hana til eignar með því skilyrði, að hún yrði endurbyggð (1953-54) og hún yrði áfram sóknarkirkja. Hún var endurvígð 1954.

Jón Jakobsson, bóndi að Klömbrum undir Eyjafjöllum, endurbyggði kirkjuna 1847 og smíðaði altarið og líklega hefur Jón Guðmundsson í Lækjarhúsum á Hofi smíðað hurðarlæsinguna sama árið. Í kirkjunni eru danskir stjakar úr tini frá 16. eða 17. öld. Ólafur Túbals, listmálari, málaði altaristöfluna. Lækir úr Hofsfjalli voru virkjaðir til ljósa. Ferðaþjónusta er rekin á Hofsbæjunum og einnig í félagsheimilinu á sumrin.

Gröf er eyðibýli skammt norðvestan Hofs.  Bærinn var einn margra, sem tók af í Öræfagosinu 1362 og týndist.  Árið 1954 fundust rústir hans og voru rannsakaðar.  Þarna fundust rústir bæjar, fjóss, hlöðu og sofnhúss, sem gáfu hugmynd um þróun bygginga frá söguöld.  Bæði sofnhús og bæjargöng eru merkileg og líkjast helzt bæjarrústum á Orkneyjum.  Meðal þess, sem fannst, voru nokkrir smámunir og fjögurra raða, heimaræktað bygg (Hordeum vulgare).

Háalda milli Sandfells og Hofs myndaðist í hlaupinu 1727.  Í henni er geysistórt jökulker (hver) eftir bráðnun risastórs jaka.  Háalda var friðlýst sem náttúruvætti árið 1975.